Op 27 Maart 1865 het kgosi Moroka II, die destydse kgosi van die Seleka Barolong, en president Jan Brand, president van die Republiek van die Oranje-Vrystaat, ’n verdrag van alliansie en bondgenootskap onderteken. AfriForum en dié tradisionele gemeenskap het hierdie historiese gebeurtenis verlede week, presies 160 jaar later, herdenk. Tydens die herdenking is die pas gerestoureerde grafte van die koninklike familie van die Seleka Barolong en die monument wat die verkiesing van die eerste Voortrekkerregering in 1836 in Thaba Nchu herdenk, onthul.
