AfriForum Sakenetwerk het gisteraand in samewerking met Akademia die wenner van die Entrepreneur van die Jaar-kompetisie aangewys. Awie Krog van Craft braai het met dié gesogte titel weggestap, asook met R50 000 kontant, ’n mediapakket van Maroela Media en ander pryse van meer as R200 000. Die beoordelaars van vanjaar se kompetisie was Charl Oberholzer, Jandre de Beer, Lizette Volkwyn, Rhona Erasmus en Stephan Bredell. Volgens Sanderien van der Walt, bestuurder van AfriForum Sakenetwerk, was die kandidate vir vanjaar se kompetisie uiters sterk en het die inskrywings sedert 2023 verdriedubbel. Sy sê verder dat hulle entrepreneurs se harde werk met die kompetisie wil beloon en hulle weet dat dit harde werk verg om ’n suksesvolle entrepreneur in Suid-Afrika te wees.
