0
02:03
Hansie Roodt – a. The happy wanderer b. Muss i denn
Hansie (Johannes Petrus) Roodt is op 28 Augustus 1938 in Krugersdorp gebore, maar het in Carletonville groot geword. Hy het leer kitaar speel by sy pa en broer, Roy, beide baie bekwame musikante. Hy het aan Hoërskool Carletonville matrikuleer, en het daarna as 'n myn-opnemer in Carletonville begin werk. In 1962 het Hansie die geleentheid gekry om saam met Al Debbo te toer, en het na drie jaar saam met Al by Nico Carstens se orkes aangesluit. In 1967 het hy ‘n solo loopbaan begin volg, hoofsaaklik as ‘n sessie-musikant vir die SAUK en vir die EMI-platemaatskappy.
Afgesien van sessiewerk in die ateljee, het hy ook kunstenaars soos Gene Rockwell, Bobby Angel, Barbara Ray, Lance James en Dan Hill begelei. In 1983 is hy aangestel as leier van die Suid-Afrikaanse Polisie-Dansorkes wat op amptelike polisiefunksies gespeel het. Die orkes het in 1984 die tweede plek in die TV boereorkeskompetisie behaal, en het in 1986 gewen.
Hansie het in 1966 die album, “Hier Is Hansie!!!” (sy eerste van vele), uitgereik, en het ook tydens sy loopbaan ‘n groot aantal liedjies self geskryf. Hy het in Pretoria gewoon tot en met sy dood op 16 September 2005.
Hierdie liedjie is in 1970 op die album "Opskud Party" uitgereik.
